Në emision “Opinion” të së hënës 30 tetor 2023, është diskutuar tema “Vajza nga Vlora, historia që tronditi Shqipërinë!”.
Një ngjarje ka mbajtur pezull thuajse prej një jave vëmendjen e shoqërisë shqiptare, ajo që ndodhi në Vlorë. Një vajze e re u gjet në orët e para të mëngjesit në një hotel në Vlorë, thuajse pa ndjenja. Ajo ishte në gjende të rënduar psikologjike, e abuzuar seksualisht nga 4 djem.
E gjithë historia erdhi në qendër të vëmendjes së mediave, duke u kthyer në një lloj qerthulli shumë të çuditshëm, me shumë protagonistë dhe shumë personazhe brenda. Palët kanë dhënë edhe shpjegimet e tyre në polici, por çfarë ka ndodhur realisht me vajzën nga Vlora? Cila është historia në vetvete? Sa qëndron ideja e abuzimit? Cilat janë pretendimet e palëve? Pikërisht për këto çështje u diskutua mbrëmjen e kësaj të hëne në studion e Opinion.
Në lidhje të drejtpërdrejtë ishte motra e vajzës, e cila kërkoi të mos identifikohet dhe Opinion e respektoi dëshirën e saj. Si dhe Albert Deliaj, pronari i televizionit.
Ndërsa të ftuar në studio për të folur për këtë temë kanë qenë: Merin Maçi, Afrovita Hysaj, Lenida Halilaj, Iris Luarasi, Vladimir Kera.
Ndërkohë, në fillim të emisionit, për rreth 17 minuta në studion e “Opinion” ishte kreu i grupit parlamentar të PD, Gazmend Bardhi, për të folur për incidentet e ndodhura pasditen e kësaj të hëne në Kuvend.
