Të hënën Donald Trump në një ceremoni madhështore u inaugurua si Presidenti i 47-të i SHBA-ve. Ky është mandati i dytë i Trump si president, i cili vjen pas një shkëputjeje.
Presidenca e Trump kësaj here duket se ka pritshmëri shumë herë më të larta se ato të 8 viteve më parë. Njëkohësisht ka më shumë vëmendje për shkak se situata botërore është shumë problematike vitet e fundit. Vëmendje ndaj Trump duket se është nga të katërta anët e globit. Së pari është vëmendja e vetë amerikanëve sa i përket ekonomisë dhe emigrantëve të paligjshëm. Është vëmendja e Europës ku marrëdhënia e Trump me vendet e BE-së është paksa e tensionuar. Raportet me NATO-n ku ai ka kërkuar një ngritje të shpenzimeve ushtarake me 4%. Pika më e nxehtë është lufta mes Rusisë dhe Ukrainës.
Nga ana tjetër, problemi më i madh mbetet ai i përballje tregtare me Kinën, çfarë do të ndodhë mes SHBA-së dhe Kinës. Ndikimi i Trump nuk do të mungojë as në vendin tonë. Qeveria i ka hapur rrugën dhëndrit të Donald Trump për të investuar në ishullin e Sazanit, kurse nga ana tjetër opozita i ka sytë nga Presidenti ai për “non gratën” e Sali Berishës.
Të ftuar: Gerta Zaimi, Julian Zyla, Klevis Balliu, Preç Zogaj
Në studio ishte edhe gazetari Merin Maçi, i cili dha detaje në studion e “Opinion” sa i takon rastit të efektivit Azbi Spahiu. Bazuar tek hetimet e deritanishme të policisë për ngjarjen dhe deklarimeve të vetë 57-vjeçarit, Maçi theksoi se ajo që ka ndodhur me të “nuk ka aspak lidhje me detyrën e tij”.
Bëhet fjalë për një incident që siç ka thënë efektivi është “shkaktuar prej gjendjes së tij jo të mirë shëndetësore”.
Në pjesën e dytë dhe të tretë, emisioni “31 minuta” i përgatitur nga Qendra për Gazetari Cilësore në bashkëpunim me Zyrën e Marrëdhënieve Publike të Ambasadës së Shteteve të Bashkuara të Amerikës në Tiranë fokusohet tek disinformimi. Lajmet e rreme, ato të manipuluar dhe censura duket se po pushtojnë rrjetet sociale dhe gjithë e më tepër po shihen si një kërcënim për informimin publik.
