Është diskutuar të hënën (4 Janar) në emisionin “Opinion”, mbi temën “Të fshehtat e drogës në bananet e Ekuadorit”.
Në pjesën e parë “Opinion” është fokusuar te kapja e 119 kg kokaine në Portin e Durrësit në një kamion që transportonte banane.
Disa nga pyetjet që janë diskutuar në “Opinion” kanë qenë: Cili ishte roli i policisë? Mënyra si është vepruar për ngjarjen? Sa ishte sasia e kokainës që ka qenë realisht e transportuar nga Ekuadori drejt Shqipërisë?
Të ftuar në studio për të folur për këtë temë kanë qenë:
- Artan Hoxha
- Klodiana Lala
Në pjesën e dytë të “Opinion” është transmetuar një intervistë me investitorin nga Dubai, Mohamed Alabbar, i cili pritet të rimodelojë Portin e Durrësit, duke e kthyer në një port për anijet turistike dhe njëkohësisht do të ndërtojë një numër godinash që pritet të dalin në tregun ndërkombëtar.
Ndërsa në pjesën e tretë emisioni “Opinion”, është fokusuar te ngjarja e ndodhur në 30 Dhjetor, ku humbi jetën alpinisti Ndoc Mulaj, në një aksident të ndodhur në malin e Munellës në zonën e Pukës, ku ndodhej në një ekspeditë.
Si pasojë e rrëshqitjes në një terren të vështirë nga dëbora, 60-vjeçari nuk ka mundur t’u mbijetojë plagëve që kishte marrë kryesisht në pjesën e kokës.
