Të mërkurën, më 5 qershor 2024, në emisionin “Opinion” u trajtua tema “Prapaskena e 3000 emigrantëve në Gjadër!”
Giorgia Meloni kryeministrja e Italisë zhvilloi ditën e djeshme një takim zyrtar në Shqipëri. Por ndryshe nga takimet e tjera tradicionale mes dy homologëve Meloni dhe Rama e zhvilluan takimin e tyre në Gjadër. Kryeministrja e Italisë pa nga afër zhvillimet që po bëhen për ngritjen kampeve në Gjadër dhe Shëngjin, të cilët do të presin emigrantët afganë të shpëtuar në det nga marina italiane.
Gjatë takimit Rama dhe Meloni patën një konferencë të përbashkët. Ata dhanë detaje dhe informacione mbi marrëveshjen duke hedhur poshtë akuzat e palëve të tjera. Pakti me Italinë për refugjatët afganë dhe deklaratat e tyre u diskutuan në studion e emisionit “Opinion” me Gerta Zaimi-n.
Në pjesën e dytë të emisionit u transmetua një material nga “Padam”, i cili festoi 8-vjetorin që operon në treg. “Padam” sot është një ndër restorantet më të mira në Tiranë. Po ajo që e bën më të bukur këtë histori është i shefi i kuzhinës, Fundim Gjepali. Ai është një emigrant tip shqiptar i cili u largua drejt Italisë në moshën 14-vjeçare përmes një gomoneje. Fillimisht ai ka punuar si një ndihmës kuzhinier deri sa në moshën 25-vjeçare ai u bë shefi i një restoranti në Itali, kurse në moshën 27-vjeçare shefi i një prej restoranteve më të mira të Romës. Sot Fundim Gjepali e vazhdon pasionin e tij për kuzhinën në atdheun tij duke qenë shef i restorantit “Padam” në Tiranë.
Në pjesën e tretë të emisionit “Opinion” në Tv Klan u trajtua historia e një prej ambasadorëve italianë në vitet 1993-1997. Ai quhet Paulo Foresti, ambasadori i cili përjetoi pothuajse momentet më të vështira të karrierës së tij, në Shqipërinë postkomuniste. Paulo Foresti ka publikuar librin e tij të titulluar “Kujtimet e një ambasadori” një libër të cilin ai e ndërton mbi bazën e recetave të darkave dhe të drekave që shtronte në rezidencën italiane për politikanët shqiptarë. Libri jep një përshkrim të asaj kohe.
Në pjesën tjetër të emisionit ishte një material mjaft interesat, ku moderatori Blendi Fevziu udhëtoi me trenin e fundit të hekurudhës shqiptare. Dokumentari i përgatitur nga “Opinion” tregon lokomotivën e fundit ekzistuese në Shqipëri. Ajo është një lokomotivë çekosllovake e sjellë që nga vitet ’60 dhe deri në vitin 1984 ku mbërrit lokomotiva e fundit, të cilat konsideroheshin në atë kohë si krenaria e hekurudhës shqiptare./Opinion.al
