Emisioni “Opinion” në Tv Klan fokusohet tek megaoperacioni i SPAK, që u zhvillua në Shijak. Mbi dy vite hetime të kryera nga Prokuroria e Posaçme çuan në zbardhjen e vrasjes së Edmir Bregut, i njohur edhe si Ilir Kuçi, në qytetin e Durrësit, si edhe në zbulimin e një skeme masive të tjetërsimit të pronave në bregdet.
Me kërkesë të SPAK, Gjykata e Posaçme firmosi 9 masa sigurimi. Për vrasjen e ndodhur në janar të 2021 në Durrës, SPAK thotë se ajo është urdhëruar si hakmarrje nga Astrit Avdylaj, i cili ndodhet në qeli. Të njëjtat hetime zbuluan edhe një skemë të tjetërsimit të pronave në bregdet nga një grup kriminal, që sipas SPAK, drejtohej nga “Rrumi i Shijakut”, i cili është në kërkim.
Ai ka bashkëpunuar me vëllain e tij dhe persona të tjerë duke falsifikuar dokumente të prodhuara nga institucionet shtetërore. Emisioni “Opinion” fokusohet gjithashtu edhe tek dosja “Aruba”, ku sipas kreut të opozitës Sali Berisha, kryeministri Edi Rama dhe disa ministra të tjerë janë takuar në Aruba me kartelë të drogës.
Të ftuar: Glidona Daci, Artan Hoxha, Eni Ferhati, Zylyftar Bregu
