Të enjten 15 shkurt 2024 në emisionin “Opinion” u trajtua tema “Mesazhet e Blinkenit në Tiranë!”.
Në pjesën e parë dhe të dytë emisioni “Opinion” është fokusuar tek vizita e Sekretarit Amerikan të Shtetit, Antony Blinken, në Shqipëri.
Ai ka qëndruar thuajse 9 orë në kryeqytetin shqiptar, duke pasur një axhendë e cila për herë të parë, në 6 vizitat e sekretarëve të Shtetit në Shqipëri, kishte disa ndryshime: nuk mori pjesë në Parlament dhe nuk takoi opozitën.
Nga ana tjetër ai zhvilloi një axhendë që parashikonte: takimin me presidentin e Shqipërisë; kryeministrin, me të cilin pati përveç takimit dhe një konferencë shtypi; takimi me ministrin e Jashtëm; një takim me studentë të rinj dhe persona të cilët janë financuar për t’u trajnuar nga qeveria e Shteteve të Bashkuara të Amerikës, ku u përfshi dhe një takim i shkurtër me përfaqësuesit e Organeve të Drejtësisë; takoi kryetarin e Bashkisë së Tiranës, në një takim në hyrje të Piramidës; si dhe pati një takim me Ambasadën Amerikane. Padyshim, takimi më i rëndësishëm ishte me kryeministrin dhe më pas, rreth mbrëmjes, edhe pse ishte parashikuar një darkë dhe një takim me përfaqësues të Shoqërisë Civile, Blinken është nisur drejt Mynihut.
Të ftuar në studio për të folur për këtë temë: Blerina Gjylamet, Baton Haxhiu, Agim Nesho, Klevis Balliu, Julian Zyla, Diana Mjeshtri. Në lidhje skype: Nikola Kedhi.
Ndërsa në pjesën e tretë është transmetuar një intervistë me Pier Vittorio Farabbi, Drejtor Operacional i Aeroportit të Tiranës, për pistën e re në Aeroportin e Rinasit që do të mundësojë fluturimet Tiranë-Nju York.
