Mbrëmjen e 19 marsit, në programin “Opinion” u diskutua lidhur me dy vrasje të bujshme, të ndodhura brenda 48 orëve, në Tiranë.
Në pjesën e parë të programit u diskutua lidhur me vrasjen e 26-vjeçarit, Jurgen Kurti. Ai u ekzekutua me armë zjarri mbrëmjen e së hënës pranë stadiumit “Selman Stermasi”, ku edhe ka humbur jetën në vend. Kurti, nuk ishte një emër i panjohur për publikun, pasi përpos jetës luksoze që reklamonte në rrjete sociale, ai ishte i përfshirë në akuza për dy vrasje, një prej të cilave e babait të tij.
Në prill të 2016-s, gjatë një konflikti familjar mbeti i vdekur babai i tij, Artur Kurti, krim për të cilin u dënua daja i Jurgenit, Leonard Ristani. Ndërsa një vit më pas, po në muajin prill, Jurgen Kurti, u përfshi së bashku me vjehrrin dhe vëllain e vjehrrit, në vrasjen e Agim Arapit në Durrës, një konflikt i lidhur me një qira të papaguar.
Ndërsa në pjesën e dytë u diskutua lidhur me arsyen e vrasjes së Haxhi Bacinozit tek Parku i Liqenit, teksa viktima kishte dalë për vrap bashkë me djalin e tij.
Baçinozi ishte një prej të dënuarve politikë më qëndrestarë ndaj regjimit komunist. Në pjesën e tretë të programit u lexua letra që Haxhi Baçinozi i shkroi Nexhmije Hoxhës, në vitin 1990, në të cilën shkruante për krimet monstruoze të regjimit ndaj shqiptarëve në përgjithësi dhe atyre të Kosovës në veçanti.
Të ftuar për të diskutuar mbi këto çështje ishin gazetarët Spartak Koka, Artan Hoxha, Ermal Vija dhe Ferdinand Dervishi, ndërsa në lidhje telefonike ndërhyri dhe Vjollca Arapi, bashkëshortja e Agim Arapit.
