Në pjesën e parë dhe të dytë të emisionit, intervista e Kryepeshkopit Joan Pelushi. Intervista është kryer në një nga ambientet e Kishës Orthodokse Autoqefale Shqiptare.
Bëhet fjalë për fortlumturinë e tij, Imzot Joanin, Kryepeshkop i Tiranës, Durrësit dhe gjithë Shqipërisë. Imzot Joani, ka lindur në Shqipërinë komuniste. Ai është rritur në Tiranën e viteve ’60-’70-’80, duke pasur një personalitet shumë interesant.
Ka jetuar në një lagje, në zemrën e asaj që konsiderohej Tirana e Ftohtë me Komunizmin, një Tiranë që e kundërshtonte komunizmin në heshtje, ku njerëzit flisnin relativisht lirshëm me njëri-tjetrin, ku kishte sinqeritet, dhe në rrugicat e së cilës ai mori kontaktet e tij të para me besimin fetar.
Ai u njoh fillimisht me librat fetarë, filloi të hynte në botën e fesë pas një kontakti me Petro Zhejin, një prej intelektualëve më brilant që Shqipëria e atyre viteve ka pasur.
I lindur dhe i rritur, i pagëzuar në fshehtësi në Shqipërinë e asaj kohe, Joan Pelushi emigroi që në fillimet e para, në fillim në Itali e më pas në Shtetet e Bashkuara të Amerikës. Por, ishte një prej atyre emigrantëve që vendosi të kthehej në Shqipëri pasi kreu shkollën teologjike në Boston. Ai vendosi t’i përkushtohej Zotit.
Pas largimit nga kjo jetë të Imzot Anastas Janullatos, ai u emërua kreu i Kishës Orthodokse Autoqefale Shqiptare.
Intervista me të, është intervista e parë në nivelit e kreut të kësaj kishe. Ajo mikson jetën e tij, formimin e tij, në Shqipërinë komuniste dhe lirinë e të drejtën e tij për të besuar në Zot e për të zgjedhur rrugën e tij pas rrëzimit të komunizmit.
Fortlumturia e tij, Joan Pelushi, kryepeshkop i Tiranës, Durrësit dhe gjithë Shqipërisë përballë Blendi Fevziut, sonte, 22 tetor, në Opinion.
