Të mërkurën, në emisionin “Opinion” u trajtua tema “Kreditë e vogla, problemet dhe rregullat e reja”.
Çfarë ka ndodhur me to? Çfarë ishte ai ‘bum’ i majit të këtij viti, ku befas një ngjarje tronditëse përpara derës së SPAK, humbi jetën e një personi dhe hapi kapakun e një problematike të grumbulluar për një kohë të gjatë? Kush kishte faj për konsumatorët të cilëve u ishin bllokuar prona e paga? Ishte një çështje e mospagimit të kredive të tyre, apo një kalkulim i gabuar i interesave që u vendoseshin përsipër? Kush e kishte fajin në këtë zinxhir dhe mbi të gjitha a duhej të ngatërrohej ky problem me kreditë konsumatore në përgjithësi?
Të ftuar në studio: Emin Barçi, Armand Bajrami, Arlinda Muja, Altin Latifi.
Në pjesën e dytë ishte në një intervistë me Sazan Fishekun. Më 7 Korrik të 1991, kur pjesa më e madhe e shqiptarëve ishin të hipur mbi anijet drejt Italisë, Sazan Fisheku, një atlet i kërcimit me shkop arriti të thyejë rekordin kombëtar shqiptar, gjatë garave të zhvilluara në kampionatin e lojërave mesdhetare në Athinë. Ai vendosi rekordin 5 metra e 40 centimetra. 33 vjet më pas ky rekord mbetet i pathyer. Me këtë rekord dhe të drejtën për të marrë pjesë në lojërat olimpike të Barcelonës, Sazan Fisheku zgjodhi rrugën e emigrantit. Ai vendosi të bëhej picajol në një qytet të jugut të Italisë. Pas 33 vitesh Sazan Fisheku ka arritur të ketë një lloj suksesi ka hapur një piceri të quajtur ‘Piceria Sazan’ në jug të Italisë dhe gjatë kësaj vere ishte edhe në Shqipëri.
Në pjesën e tretë të emisionit “Opinion” ishte historia e dy shqiptarëve të cilët emigruan shumë herët në SHBA dhe këtë vit u kthyen së bashku me miqtë e tyre amerikanë për të bërë punë vullnetare në Tropojë për një kohë të gjatë. Ndërtuan një çerdhe, një kamp veror për fëmijë dhe një qendër ‘remote’ në të cilën mund të punosh nga Tropoja për kompanitë e mëdha amerikane./Opinion.al
