Të martën, më 11 qershor 2024 në emisionin “Opinion” u trajtua tema “Gjykata vendos, vulën e ka Berisha!”
Para se të fillonin diskutimet në studio, drejtuesi i emisionit Blendi Fevziu pati në një lidhje të drejtpërdrejt gazetaren Glidona Dacin, me të cilën trajtoi çështjet e kronikës së zezë.
Në pjesën e parë u diskutua në studio vendimi i Gjykatës së Apelit, e cila vendosi të kthejë mbrapsht vendimin duke lënë në fuqi vendimin e parë. Vula e Partisë Demokratike i takon grupit të Rithemelimit që drejtohet nga Sali Berisha. Zyrtarisht, Sali Berisha është kryetar i Partisë Demokratike në bazë të vendimeve të kuvendit të 11 dhjetorit.
Çfarë do të ndodhë me këtë vendim? Çfarë do të sjellë ai në politikën shqiptare? Çfarë do të ndodhë me pjesën tjetër që deri më tani ka mbështetur Lulzim Bashën, nisur kryesisht nga ata që e mbështesnin në emër të logos së Partisë Demokratike? A do të shkojë ky grupim i tërhequr drejt formimit të një strukture të re apo do të pranojë vendimin e gjykatës?
Të ftuar: Oerd Bylykbashi, Preç Zogaj, Marsela Karapanço, Andi Tela
Në pjesën e dytë të emisionit ishim në Marina Bay. Disa ndërtues nga Vlora ndërtuan një seri apartamentesh për t’i shitur në një nga gjiret më të bukura të Vlorës por apartamentet nuk u shitën. Ndërtuesit ngelën në një borxh të madh financiar dhe vendosën ta kthejnë në një hotel. Nga ky mosfunksionim patën fatin të ndërtojnë një strukturë turistike që ka sot 92 dhoma, 8 suita, 3 restorante, 11 bare, kazino dhe që është një prej strukturave të nivelit të mesëm dhe të lartë në Shqipëri.
Në pjesën e tretë kisjim “Baladë dritash”, kështu quhet libri monografik për krijimtarinë dhe jetën e Zef Zorbës. Një krijues që në vitet e komunizmit ishte i mbetur në heshtje, i izoluar, nuk pati jehonë, ndërkohë ishte shkolluar në Itali, mbeti në Shqipëri gjatë Luftës së Dytë Botërore, ka punuar në bankën e Napolit, ishte arsimuar për Shkenca Politike në Padova, njihte mirë artet, ishte nipi i Kol Idromenos. Ishte edhe një prej personave që regjimi komunist i gjuante për t’i dërguar në burg. Edhe në kënetën e Maliqit ai mbijetoi dhe arriti të shkruante diçka që sot vjen përmes monografisë “Baladë dritash”.
