Mbrëmjen e së hënës në emisionin “Opinion” drejtuar nga Blendi Fevziu u diskutua për librin e mjekut personal Enver Hoxhës, Isuf Kalo, “Blloku”.
Të ftuar në studio për të biseduar rreth kësaj teme ishin pedagogia Jonila Godole, politologu Fitim Zekthi, gazetari Mentor Kikia, analisti Preç Zogaj, studiuesja Nevila Nika dhe sociologu Ergys Mërtiri.
Sipas Zekthit libri ka dy shina: “Paraqet një Bllok rozë, me njerëz që vishen bukur, që kanë sherre, kanë inate, kanë dashuri ku di unë… dhe shina e dytë, është glorifikimi i krimeve të komunizmit, pra zbukurimi i krimeve të komunizmit. Pra Enver Hoxha, aty del si një lider autoritar, i mirë, pra po ta shkëpusësh Shqipërinë, të lexosh librin, do kuptosh që bëhet fjalë për një vend me një lider që i dhimbset populli, ka shqetësime të zakonshme, nuk bën krime, nuk ka kampe përqendrimi, nuk ka të burgosur politikë,”-u shpreh ai në studion e “Opinion”.
Ndërkohë Kryeredaktori i Klan Plus Mentor Kikia u shpreh se libri i doktor, Isuf Kalos nuk është libër historik. Sipas tij, Kalo ka shkruar një libër me kujtime, ku ndihet afeksioni që doktori kishte për familjen e ish-diktatorit.
Sipas pedagoges Jonila Godole, Kalo nuk mund të jetë kurrsesi një person apolitik, duke qenë se jetoi për një kohë të gjatë pranë familjes së diktatorit Enver Hoxha.
Në fjalën e tij sociologu Mërtiri theksoi se Kalo, në librin “Blloku” përshkruan anën rozë të një gjëje, e cila në fakt ishte “ferr”./Opinion.al/
