Kamera e emisionit “Opinion”, e shoqëruar nga Erjola Braha, presidentja e “Alehandro Group”, një biznesmene që e ka nisur karrierën e saj në moshën 20-vjeçare dhe sot përfaqëson disa nga kompanitë më të mëdha të verës dhe shampanjës të botës në Shqipëri, arriti të hyjë në një prej bodrumeve më të rëndësishme dhe më të rralla të botës. Louis Roederer, kompania e cila prodhon shampanjën ndoshta më të shtrenjtë të botës, hapi dyert e bodrumit të saj të verërave ku gjendet një pasuri prej miliardash. Ajo i hap dyert shumë rrallë për mediat për arsye nga më të ndryshme, por kamera e “Opinion” do të na tregojë bodrumin e Louis Roederer, në shtëpinë e tij, aty ku themeluesi i kompanisë ka jetuar dhe më pas në vreshtat ku prodhohet një prej shampanjat më të rralla të botës. Louis Roederer ka prodhuar një shampanjë ekskluzivisht për Carin e Rusisë dhe mbante emrin Cristal. Të shoqëruar nga stafi i Louis Roederer, “Opinion” ka marrë një shpjegim pse shampanja ka këtë vlerë? Kush janë tokat që prodhojnë rrush për shampanjën? Si ndahet mes kompanive të mëdha? Një prej pasurive më të rralla të botës, në emisionin “Opinion”.
Në pjesën tjetër emisioni “Opinion” u fokusu te zhvillimet në Siri dhe te avancimi i forcave anti-Assad që sollën çlirimin e vendit, marrjen e Damaskut dhe gjithë pikëpyetjet që lidhen me këtë ngjarje.
Të ftuar: Gerta Zaimi, Gentian Mara
Në pjesën e fundit të emisionit ishte Ammar Alsalmo, një vullnetar nga Alepo i “Helmetave të Bardha”, e ka jetuar nga afër këtë moment. Ai u shpreh se Assad u la në baltë nga Rusia dhe Irani këtë herë.
“Assad mbahej në pushtet me gënjeshtra. Në vitin 2013 i u mbështet tek Irani dhe Rusia, por në vitin 2024 nuk kishte ku të mbështetej. Rusia e la, Irani e la dhe mund të themi që ky ishte shansi më i mirë i grupeve luftuese”, tha ai.
Sipas qytetarit të Alepos, mentaliteti i grupeve rebele ishte ndryshe nga disa vite më parë. Ai theksoi se ata nuk sulmuan dhe nuk vranë askënd nga ata që mbështetën regjimin e Assad.
“Kjo është premtuese. Si sirian, unë dua falje. Ne jemi të gjithë sirianë”, tha Alsalmo.
Tashmë sirianët janë në gjendje të luftojnë për të ardhmen e tyre ndërsa miliona refugjatë po kthehen në shtëpitë e tyre.
