Eduard Lir/ Një prej gravuristëve që në vitet 1848-1858 e vizitoi Shqipërinë në disa udhëtime njëra pas tjetrës. Falë tij sot kemi imazhe thuajse 200-vjeçare të trojeve shqiptare të asaj kohe. Ai ka lënë gravura të mrekullueshme. Sot është shumë i vlerësuar dhe pjesë e koleksioneve më të mira botërore në Yale, Harvard dhe Galerinë e Arteve në Edinburg. 3 gravura të tij me temë nga Shqipëria, “Berati, “Shkodra” dhe “Vunoi”, i përkisnin njërit prej koleksionistëve më të mëdhenj të Britanisë së Madhe që ndërroi jetë dhe tashmë i kanë rënë në dorë një galeristi të njohur në Edinburg.
Ky i fundit i ka kërkuar Auron Tares që nëse shteti shqiptar është i interesuar, ai nuk do t’i nxjerë në ankand këto gravura, por do t’i japë me çmimin që familja ka në mënyrë që të jenë pjesë e Galerisë Kombëtare të Arteve ose Muzeut Historik Kombëtar. Shqipëria nuk ka asnjë vepër të Eduard Lir, edhe pse ai është piktori me më shumë imazhe të Shqipërisë nga ata që ne njohim.
