Dy fëmijë me diagnoza shumë të rënda u operuan me sukses në Urgjencë, duke shënuar një moment të rëndësishëm për shërbimin pediatrik.
Lajmi është bërë i ditur nga ministrja e Shëndetësisë, Albana Koçiu përmes një postimi në rrjete social ku ka dhënë detaje për operacionin.
Mësohet se njëri nga fëmijët, vetëm një muajsh dhe me peshë 2.9 kg me ndërprerje të harkut të aortës, dhe tjetri 3 muajsh me defekt interventrikular, iu nënshtruan ndërhyrjeve delikate falë bashkëpunimit të shkëlqyer midis ekipeve të Kardiokirurgjisë dhe Reanimacionit të Pediatrisë në Qendrën spitalore “Nënë Tereza”.
Ekipi i mjekëve drejtohej nga kardiokirurgu Altin Veshti, njëkohësisht edhe shefi i Kardiokirurgjisë në QSUT.
“Dy fëmijë me diagnoza shumë të rënda u operuan me sukses në urgjencë, duke shënuar një moment të rëndësishëm për shërbimin pediatrik. Njëri nga fëmijët, vetëm 30 ditësh dhe me peshë 2.9 kg me ndërprerje të harkut të aortës, dhe tjetri 3 muajsh me peshë 4.9 kg me defekt interventrikular, iu nënshtruan ndërhyrjeve delikate falë bashkëpunimit të shkëlqyer midis ekipeve të Kardiokirurgjisë dhe Reanimacionit të Pediatrisë në QSU “Nënë Tereza”.
Operacionet u realizuan me profesionalizëm nga ekipi i mjekëve: Prof. Altin Veshti, Dr. Fiorba Manaj, Dr. Klodiana Durici, dhe anestezistët Prof. Asoc. Saimir Kuçi, Prof. Asoc. Alfred Ibrahimi, Dr. Marsela Goga dhe infermieret Majlinda Malaj dhe Nerenza Elezi.
Një falënderim i veçantë shkon për ekipin e Reanimacionit të Pediatrisë, me në krye Prof. Mira Kola, që garantuan një ndjekje rigoroze post-operatore si edhe për ekipin e mjekëve kardiopediatër, dr. Numila Maliqari dhe dr. Albert Koja, të cilët janë faktor kyç në procesin e diagnostikimit të rasteve me probleme kardiake të pediatrisë.
Një shembull frymëzues bashkëpunimi dhe profesionalizmi që tregon se kujdesi i dedikuar sjell mrekulli”, shkruan Koçiu.
