Seksioni i Pastrimit të Parave i Policisë së Tiranës në bashkëpunim me Prokurorinë ka finalizuar operacionin “Vllazëria”, ku janë sekuestruar nëntë apartamente, dy dyqane dhe një garazh me vlerë totale 2,2 milionë euro.
Pasuritë janë sekuestruar pasi ekzistojnë dyshime se janë përfituar nga paratë e aktiviteteve kriminale të dy vëllezërve Armando dhe Alket Gorezi.
“Seksioni për Pastrimin e Parave në DVP Tiranë, në bashkëpunim me Prokurorinë e Rrethit Gjyqësor Tiranë në funksion të procedimit penal të vitit 2018 “Pastrimi i produkteve të veprës penale ose veprimtarisë kriminale”, në ngarkim të shtetasve A. G., 44 vjeç dhe A. G., 47 vjeç (vëllezër), finalizoi operacionin policor të koduar “Vllazëria”, në kuadër të të cilit u bë ekzekutimi i vendimit të Gjykatës dhe sekuestrimi preventiv i nëntë apartamenteve, dy dyqaneve, një garazhi në Tiranë dhe Durrës, që kapin vlerën e 2,2 milionë euro”, njofton policia.
Sekuestrimi vjen pas një pune disa mujore ku janë identifikuar pasuri të cilat nuk justifikoheshin nga ana ekonomike e financiare dhe rridhnin nga aktiviteti kriminal i dy vëllezërve./Opinion.al
