Policia ka arrestuar një person dhe ka shpallur në kërkim një tjetër në kuadër të një operacioni ndërkombëtar të trafikut të drogës, i cili u zhvillua njëkohësisht në disa shtete të Europës.
Operacioni “Kitchen” në Shqipëri u finalizua me arrestimin e 33-vjeçarit P.H. banues në Peqin, si dhe shpalljen në kërkim të shtetasit J.S. , të cilët ishin shpallur në kërkim nga gjykata e Brescias në Itali për trafikim të lëndëve narkotike.
Hetimi ka filluar në muajin tetor të vitit 2017 dhe ka vijuar me intensitet duke sjellë arrestime dhe goditje gjatë vitit 2018, kur janë bërë edhe sekuestrimet dhe arrestimet më të shumta.
Hetimi ka pasur si shenjestër një grup të strukturuar marokenësh dhe italianësh që trafikonin hashash nga Maroku, por më pas janë zbuluar edhe elementë të një grupi kriminal me origjinë shqiptare që trafikonin kokainë nga Holanda, duke furnizuar tregun në Italinë e Veriut, konkretisht zonën e Brescias. /Opinion.al
