SPAK kryen një operacion me autoritetet gjermane, ku është goditur një grup kriminal për mashtrimin kompiuterik.
Nga operacioni i koduar Pandora, 5 persona kanë rënë në pranga, 3 të tjerë janë në arrest shtëpie ndërkohë 2 të tjerë janë shpallur në kërkim.
Shtetas gjermanë kanë pre e mashtrimit, ndërsa grupi përdorte për mashtrim Call Center-in, ku dëmi i shkaktuar përllogaritet në vlerën e 363 mije euro.
Gjatë fjalës së tij, Prokurori i SPAK Eduard Nakuçi u shpreh:
‘Në kuadër të këtij operacioni ndërkombëtar, në datën 18 prill të vitit që kaloi, nga ana e Prokurorisë së Posaçme është ushtruar kontroll në ambientet e një call centeri të paligjshëm në Shqipëri ku u gjetën dhe janë sekuestruar prova materiale të dyshuara të shumta, digjitale dhe dokumetare. Në kushtet kur kishim të bënim me dy hetime paralele në Gjermani dhe në Shqipëri, rezultatet dhe provat digjitale të kontrolleve u dërguan për një analizë më të rhelluar pranë autoriteteve gjyqësore gjermane. Në përgjigje, në sajë të bashkpëunimit gjyqësor ndërkombëtar, nga ana e autoriteteve gjermane u dërgua analiza e plotë e këtyre provave digjitale, të cilat të analizuara në harmoni me provat materiale dokumentare të sekuestruara në Shqipëri, ditën e kontrollit, çuan në rezultatin e qartë të ekzistencës të një grupi të strukturuar kriminal me qëllim mashtrimin e shtetasve gjermanë, por jo vetëm nëpërmjet qendrës së call centerave të paregjistruar si biznes në organet tatimore’.
Teksa fliste në konferncën për mediat, Nakuçi tha se vlera e dëmit të shkaktuar ndaj 14 viktimave tejkalon 363 mijë euro, ndërsa shpjegoi edhe si u realizua operacioni i parandalimit.
‘Vlera e dëmit të shkaktuar dhe të dokumentuar për këtë fazë të hetimit për periudhën disamujore të call center-it është 363, 501 euro dhe bëhet fjalë për 14 viktima të mashtrimit në Gjermani. Vlera relativisht e ulët e dëmit të shkaktuar është meritë e risisë që paraqet ky hetim që është parandalimi i qindra tentativave për mashtrim të kryer nga autorët kundrejt viktimave gjermane. Sapo merreshin në telefon nga mashtruesit, viktimat më pas kontaktoheshin nga oficerët e policisë gjermane duke iu shpjeguar skemën e mashtrimit dhe anulimin e pagesave. Kjo ka sjellë parandalimin e mashtrimit në shuma më të mëdha te këto viktima’.
Prokurori pohoi se “nga hetimi që kemi kryer janë shpëtuar 6 mijë raste dhe u shpëtuan gati 1 milionë euro.”
