Në orët e para të së enjtes SPAK arrestoi gjyqtaren e Krujës Enkeleda Hoxha, kryesekretaren e Ela Mallkuçi dhe avokatin Aldo Tabaku, si dhe ka shoqëruar dhjetra persona të cilët punojnë në Gjykatën e Krujës. Këta persona dyshohen se janë të përfshirë në një skemë korruptive.
Sipas raportimeve gjyqtarja ishte nën vëzhgim nga autoritetet. News 24 raporton se si rrjedhojë e hetimeve disa mujore rezulton se gjyqtarja Hoxha kishte marrë bashkë me avokatin Aldo Tabaku një shumë të konsiderueshme parash për lirimin me kusht të një dënuarit për vrasje që vuante dënimin në burgun e sigurisë së lartë në Krujë edhe pse ILD në dhjetor ka kërkuar shkarkimin e saj.
Gjyqtarja Enkeleda Hoxha ka liruar nga burg ish-anëtarin e bandës së Durrësit, Endrit Dokle, i cili ka qenë i dënuar me burgim të përjetshëm.
Po ashtu, përmes gjyqtares Hoxha, lirinë e fitoi Genc Tafili, i dënuar për vrasjen e komisarit të policisë Arben Zylyftari si dhe Ilir Pajës, të cilit i kishte mbetur mbi një vit dënim. Po kështu, ka liruar edhe Hekuran Billën, i cili u vra në një atentat më 12 Qershor 2020 në zonën e Komunës së Parisit në Tiranë.
