Ish-kryeministri, Sali Berisha ka reaguar këtë të enjte edhe aksionin e fundit të SPAK ku është arrestuar biznesmeni Pëllumb Gjoka, ish-drejtori i Operacionales, Oltion Bistri dhe prokurori Xhevahir Lita.
Në një dalje për mediat nga selia blu, Berisha tha se Gjoka është një nga banditët kryesorë që ka grabitur toka në Velipojë me ndihmën e Ramës. Ai gjithashtu hodhi akuza të rënda ndaj tij duke e akuzuar edhe për vrasje.
Ndërsa për Oltion Bistrin, Berisha u shpreh se është një nga eksponentët e krimit në Shqipëri dhe Ballkan.
“Krahas shkarkimit të Damian Gjiknurit, numrit dy të PS, sot është njoftuar arrestimi i disa krerëve të botës së krimit shtetëror dhe të lidhur me shtetin. Sot është arrestuar Pëllumb Gjoka, një nga banditët kryesorë, një njeri, i cili me ndihmën e Edi Ramës, ka grabitur rreth 100 mijë metra katrorë në Velipojë. Akuzohet edhe për vrasje njerëzish. Pëllumb Gjoka ka një motel këtu, të cilit Edi Rama i ka dhënë apo donte t’i jepte pesë yje dhe kazino. Pëllumb Gjoka ishte po kaq i afërt me Edi Rramën sa Damian Gjiknuri. Por mbi Pëllumbin ishte Bistri. Bistri është një nga eksponentët e krimit në Shqipëri dhe Ballkan. Ai drejtonte Drejtorinë Operacionale të Policisë së Shtetit. Oltion Bistri është një përbindshëm i krimit. Nga hajdut ordiner te autor i të gjitha llojeve të dhunimit të ligjit. Ai zbatonte urdhrat e prokurorisë për arrestimin e bashkëpunëtorëve të tij në krim, ndaj edhe ata ia mbathnin lirshëm se njoftoheshin para se të ekzekutohej urdhri. Të gjithë ata që zbatojnë ligjin, do kenë mbështetjen e plotë të PD”, tha Berisha.
