Ambasadori i Bashkimit Europian në Tiranë, Luigi Soreca ka deklaruar se Operacioni Forca e Ligjit po monitorohet për mënyrën e zbatimit të tij.
Soreca ishte sot në policinë kufitare në Gjirokastër sëbashku me kreun e OFL-së, Drejtorin e Përgjithshëm të Policisë, Ardi Veliu.
“Po më pyesni sikur të jem prokuror apo sikur në krye të Operacionit Forca e Ligjit. Ajo që mund të them është që ky ligj i posaçëm aplikon parimin që është parimi i ndjekjes së parasë. Ndërsa ligji është i qartë në lidhje me subjektet e tij për ata që janë dënuar për krime të tilla ose që janë nën hetim për krim të organizuar. Dhe më lejoni të them që për ne ajo që është vërtetë e rëndësishme është mënyra se si do të zbatohet ligji. Ne po e monitorojmë nga afër zbatimin e këtij ligji. Është e rëndësishme që ligji të zbatohet në mënyrë të tillë që të jetë në përputhje të plotë dhe me të drejtat e njeriut”, theksoi ambasadori Soreca.
Ndërsa drejtori i Përgjithshëm i Policisë së Shtetit, Ardi Veliu, u shpreh se do të hetohen të gjithë ata persona që janë subjekt i OFL-së.
“Akti normativ ka vetëm 5 ditë që është duke u implementuar. Ju garantoj se çdo individ i cili është subjekt i këtij ligji do të jetë pjesë e hetimeve. OFL do të respektojë të gjitha detyrimet që janë përcaktuar në këtë akt normativ”, u shpreh Veliu.
Vizita e Sorecës dhe Veliut ishte në kuadër të FRONTEX. Ambasadori i BE ndër të tjera është shprehur se bashkëpunimi mes forcave kufitare shqiptare dhe FRONTEX ka prioritet në tre shtylla, kontrolli i parregullt i emigracionit, goditja e krimit të organizuar si dhe pika e tretë forcimi i bashkëpunimit të Shqipërisë me Bashkimin Evropian. /Opinion.al
