Policia ka zbuluar ditën e sotme një parcelë të madhe me fidanë kanabisi në zonën e Niklës.
Sipas të dhënave, në parcelën e fshehur në një zonë të pyllëzuar u zbuluan më shumë se 1140 fidanë të dyshuar narkotikë cannabis sativa, të cilat u asgjësuan me djegie.
Ndërkohë uniformat blu kanë vijuar punën për identifikimin dhe kapjen e autorëve që kanë lidhje me këto parcela kanabisi.
“Në zbatim të planit operacional mbarëkombëtar të koduar “Territor i pastër”, i hartuar nga Drejtoria e Përgjithshme e Policisë së Shtetit, për intensifikimin e kontrolleve, me qëllim parandalimin dhe goditjen e tentativave që në fazë fillestare, të kultivimit të bimëve narkotike, shërbimet e Policisë vijojnë kontrollet e imtësishme të territorit, në terrene malore dhe në zona të pyllëzuara.
Kontrollet janë përqendruar në zonat e pyllëzuara të territoreve të Niklës dhe Fushë Krujës. Si rezultat i këtyre kontrolleve, janë konstatuar 1140 fidanë të dyshuar narkotikë cannabis sativa, në kubikë dhe të hedhur në tokë së fundi, me qëllim kultivimin. Fidanët u asgjësuan me anë të djegie”, tha policia.
Materialet procedurale i kaluan Prokurorisë pranë Gjykatës së Rrethit Gjyqësor Krujë, për veprime të mëtejshme, për veprën penale “Kultivimi i bimëve narkotike”./Opinion.al
