27 persona janë arrestuar në një operacion të përbashkët mes Italisë, Shqipërisë dhe Spanjës.
Klan News raporton se 20 prej tyre janë me masë arrest në burg ndërsa 7 janë në arrest shtëpie. Sipas asaj që raportojnë mediat italiane droga ruhej në një qendër të pritjes së emigrantëve në periferi të Romës.
Hetimi zbuloi se objekti ishte gjithashtu një vend rekrutimi për migrantët nigerianë, mbajtës të lejeve të qëndrimit të përkohshëm, të përfshirë në aktivitete të paligjshme. Sasitë e mëdha të marijuanës importoheshin nga Vlora dhe shpërndaheshin në të gjithë Europën falë një aleance mes grupeve kriminale shqiptare dhe nigeriane.
Organizata transportonte drogën duke përdorur transportin publik. Mediat italiane raportojnë se falë bashkëpunimit me policinë lokale dhe mbështetjen e Drejtorisë Qendrore të Policisë Kriminale dhe Interpolit, disa arrestime u bënë në Vlorë dhe në provincën e Barcelonës.
27 persona që janë me masë sigurie akuzohen, për trafik droge, posedim dhe furnizim me lëndë narkotike, zhvatje, armëmbajtje pa leje dhe regjistrim fiktive të pasurisë.
Nga policia shqiptare ende nuk ka njoftim zyrtar, pritet të ketë në vijim.
