Policia e Shkodrës ka zbuluar 5 parcela me kanabis dhe kanë asgjësuar 10 536 bimë dhe 728 fidanë kanabisi.
Sipas uniformave blu mësohet se kontrollet janë ushtruar në zonat e pyllëzuara të Shkodrës, Malësisë së Madhe dhe Vaut të Dejës.
Për këtë operacion janë angazhuar 170 punonjës policie dhe janë përdorur 6 dronë të cilësisë së lartë, që kanë ndihmuar në fiksimin e imazheve për të zbuluar parcelat me drogë.
“Qarku Shkodër/Vijon megaoperacioni kombëtar anticannabis i koduar “Territor i pastër”.
Kontrolle intensive në të gjithë territorin e qarkut, me qëllim evidentimin dhe goditjen e tentativave për kultivim të bimëve narkotike.
Në këtë fazë të megaoperacionit u përfshinë Drejtoria Vendore e Policisë Shkodër, Komisariati i Policisë Shkodër, Komisariati i Policisë Malësi e Madhe, Komisariati i Policisë Vau i Dejës dhe 2 njësi të Forcës Kombëtare të Sigurisë, Njësia Shkodër.
Për kontrollet e territorit u angazhuan 30 grupe kontrolli (gjithsej 170 punonjës policie) dhe 6 dronë të cilësisë të lartë.
Gjatë kësaj faze të megaoperacionit, në Shkodër dhe në Malësi të Madhe, u gjetën dhe u asgjësuan 10 536 bimë dhe 728 fidanë cannabisi.
Konkretisht, në Dukagjin, Shalë dhe Postribë u gjetën dhe u asgjësuan 6600 bimë narkotike të mbjellura në tokë.
Në njësinë administrative Kelmend, Malësi e Madhe, u gjetën dhe u asgjësuan 3528 bimë cannabisi të mbjellura në tokë dhe 728 kubikë me fidanë narkotikë (ende të pambjellur në tokë).
Në Vaun e Dejës, u gjetën dhe u asgjësuan 408 bimë cannabisi të mbjellura në tokë”, njofton policia.
