Kryeministri Edi Rama gjatë konferencës së sotme për mediat në kuadër të samitit të Ballkanit të Hapur që po mbahet në Beograd tha se në këtë samit përveç përfaqësuesve të Turqisë dhe Hungarisë, ishin ftuar edhe ministrat e Jashtëm të Italisë dhe Greqisë.
Teksa theksoi se këta të fundit nuk ishin të pranishëm për shkak të aktiviteteve të tyre të planifikuara dhe fushatës elektorale në Itali Rama tha mos u çuditni që një ditë edhe një nga këta të mëdhenjtë të thotë: “A mund të vij dhe unë”.
“Ne kemi ftuar Turqinë, Greqinë, Italinë dhe Hungarinë dhe e kemi bërë publike këtë gjë. Nëse sot nuk ishin Greqia dhe Italia, ishte për arsye objektive. Njëri është në fushatë elektorale tjetri është në një angazhim të mëparshëm. Dhe e kemi bërë publike këtë gjë. Greqia dhe Italia munguan për arsye objektive. Në Tiranë do të ftojmë edhe të tjerë, se do të duan edhe të tjerë. Mos u çuditni që një ditë edhe një nga këta të mëdhenjtë të thotë: “A mund të vij dhe unë?” Ne i mirëpresim të gjithë”, tha Rama.
