Prokurori i Përgjithshëm Olsian Çela ka urdhëruar ristrukturimin e organikës së Policisë Gjyqësore në 12 prokuroritë e rretheve.
Në njoftimin e Prokurorisë së Përgjithshme thuhet se ristrukturimi do të kryhet bëzuar në problemet e konstatuara gjatë analizave vjetore mbi ngarkesën në punë të prokurorëve dhe oficerëve të policisë gjyqësore, kërkesave të ardhura nga disa prokurori për shtim të numrit të OPGJ
Në vijim, Olsian Çela ka firmosur edhe kontrollin e një viti pune për oficerët e policisë gjyqësore në Tiranë, të cilët do t’i nënshtrohen për çdo dosje një filtri për të parë rezultatet e tyre.
“Prokurori i Përgjithshëm për të kontrolluar veprimtarinë e oficerëve të policisë gjyqësore, në zbatimin e ligjit penal, procedural dhe udhëzimeve të Prokurorit të Përgjithshëm për periudhën 1 janar 2019 deri në 31 dhjetor 2019 dhe ato të mbartura nga viti 2018, ka urdhëruar ushtrimin e kontrollit mbi treguesit e punës hetimore në veprimtarinë e oficerëve të policisë gjyqësore të Seksionit të Policisë Gjyqësore në Prokurorinë me ngarkesën më të madhe, asaj pranë Gjykatës së Rrethit Gjyqësor Tiranë. Rekomandimet e mundshme në përfundim të kontrollit, synojnë përmirësimin e treguesve në veprimtarinë e oficerëve të policisë gjyqësore”, thuhet në njoftimin e Prokurorisë së Përgjithshme.
Oficerët e Policisë Gjyqësore janë personat që ndihmojnë prokurorin me veprimet operacionale gjatë një hetimi. Me ndryshimet e reformës ata përfitojnë një status më të lartë dhe trefishim të pagës. /Opinion.al
