Gjimnasti holandez Yuri Van Gelder është përjashtuar nga Olimpiada për shkak se ka qenë i pirë në Fshatin Olimpik. Vendimin e ka marrë Komiteti Olimpik Holandez, që ka kthyer pas në shtëpi gjimnastin ish-kampion bote (në vitin 2005), me akuzën se ka thyer kodin etik të brendshëm. Ditën e shtunë, gjimnasti Van Gelder siguroi kualifikimin për në finalen e garës së unazave, pasi bëri një paraqitje të mirë në garat kualifikuese. Po të njëjtën mbrëmje, sportisti ka lënë pa njoftuar Fshatin Olimpik, duke u kthyer në orët e para të së dielës, në gjendje të dehur.
Duke parë situatën, Komiteti Olimpik Holandez, duke parë se ishte shkelur dy herë kodi i etikës (largim pa leje dhe i pirë në Fshatin Olimpik), ka vendosur ta përjashtojë nga Olimpiada edhe pse bëhet fjalë për një sportist që mund t’i jepte medalje. “Ishte një vendim i vështirë për ne, por nuk kishim zgjedhje tjetër. Yuri theu rregullat, të cilat duhen respektuar. Të gjithë sportistët e tjerë i kanë respektuar standartet e vendosura”, thanë drejtues të olimpizmit holandez. Kjo nuk është hera e parë që Van Gelder, 33 vjeç, bën të tilla gjeste (është skualifikuar një vit, pasi ka dalë pozitiv me kokainë).
