Federata Ndërkombëtare e Boksit Amator (AIBA) ka vendosur të përjashtojë nga Lojërat Olimpike “Rio 2016” gjashtë gjyqtarë të boksit, pasi akuzohen për njëanshmëri në vendimet që ata kanë marrë gjatë dueleve të Olimpiadës. Polemikat për disa vendime të marrë gjatë turneut të dorezave kanë qenë të shumta, ndaj dhe AIBA ka riparë edhe një herë të gjitha duelet e zhvilluara dhe që kanë ngjallur dyshim. Dhe ka arritur në vendimin se disa gjyqtarë nuk janë në nivelin e duhur, duke i përjashtuar ata nga aktiviteti olimpik. Por asnjë nga rezultatet e dueleve të zhvilluara dhe që kanë ngjaallur dyshime nuk do të ndryshojë.
AIBA gjithashtu nuk ka bërë me dije emrat e gjyqtarëve, por dyshimet lindën këtë javë, kur boksierët irlandezë dhe amerikanë hodhën hije dyshimi për vendimet e marra, duke deklaruar se janë “vjedhur”. Dhe pothuajse të gjitha vendimet e dyshimta janë dhënë në adresë të boksierëve të Europës Lindore. “Duke parë disa dyshime nga ana e sportistëve e trajnerëve analizuam të gjitha sfidat dhe morëm vendimin për të larguar disa gjyqtarë, të cilët i konsiderojmë të papërshtatshëm”, thuhet në deklaratën e AIBA, ndërkohë që deri më tanië janë zhvilluar 293 duele, por vetëm disa prej tyre mund të jenë të trukuara. Por AIBA beson se nuk ka trukime dhe korrupsion, por thjesht papërgjeshmëri apo nivel i ulët i gjyqtarëve të boksit.
