Sekretari i Përgjithshëm i Kombeve të Bashkuara, Antonio Guterres ka kërkuar që të bëhen të gjitha përpjekjet e mundshme për t’i dhënë fund racizmit të lidhur me pandeminë. Ai shtoi se koronavirusi vazhdon të shkaktojë një tsunami urrejtjeje dhe ksenofobie, sharjesh dhe frikësimi.
“Ndjenjat kundër të huajve janë shtuar në internet dhe në rrugë, ndërsa janë shpërndarë me shpejtësi teoritë konspirative antisemite, dhe kanë ndodhur sulme kundër myslimanëve lidhur me COVID-19”, theksoi ai.
Guterres deklaroi se emigrantët dhe refugjatët janë shigjetuar si burim i virusit dhe për pasojë u është mohuar qasja në trajtimet mjekësore.
Sekretari i Përgjithshëm apeloi për një përpjekje gjithëpërfshirëse për t’i dhënë fund gjuhës së urrejtjes në nivel global. Ai kërkoi nga liderët politikë që të tregojnë solidaritet me të gjithë njerëzit, ndërsa u bëri thirrje mediave, veçanërisht rrjeteve sociale, që të eliminojnë përmbajtjet raciste, përçmuese dhe të dëmshme.
“U kërkoj të gjithëve, kudo, të ngrihen kundër urrejtjes dhe të trajtojnë njëri-tjetrin me dinjitet dhe të shfrytëzojnë çdo mundësi për të shpërndarë mirësi”, përfundoi video-mesazhin kreu i OKB-së.
