Një raport i ri i Kombeve të Bashkuara thotë se 4.1 miliardë njerëz në botë janë përdorues të internetit.
Unioni Ndërkombëtar i Telekomunikacionit (ITU), e cila është agjenci e OKB-së, u shpreh në raportin e publikuar të martën se shifra paraqet 5.3% rritje nga viti 2018.
Përqindja më e lartë e përdoruesve të internetit është në Evropë, me 82.5% ndërsa më e ulëta në Afrikë, me 28.2% thuhet në raport.
Sipas të njëjtit raport, 3.6 miliardë njerëz nuk kanë internet dhe shumica e tyre jetojnë në vende më pak të zhvilluara, ku “një mesatare prej 2 nga 10 njerëz është online”.
Raporti thotë se shkalla e grave që përdorin internetin në të gjithë botën është 48%, krahasuar me 58% të burrave.
“Derisa hendeku digjital gjinor është duke u zvogëluar në Bashkësinë e Shteteve të Pavarura dhe Evropë ai po rritet në Afrikë, shtetet arabe dhe rajonin e Azi-Paqësorit”,- shkruhet ndër të tjera në raport.
Doreen Bogdan-Martin, drejtoreshë e Byrosë së ITU-së për Zhvillimin e Telekomunikacionit, tha se qeveritë duhet të përqendrohen në hapa “drejt zhvillimit të aftësive digjitale, veçanërisht në botën në zhvillim”.
“Edhe aty ku ekziston lidhja në internet, ne duhet të jemi më kreativë në adresimin e çështjeve kritike, si: përballimi i shërbimeve, kostoja e aparateve, mungesa e aftësive digjitale dhe analfabetizmi, për të aftësuar më shumë njerëz, e veçanërisht gra”.
