Deputeti i Halit Valeteri i cili ka hyrë në parlament nga listat e PD, mbajti sot një fjalim të ashpër në parlament kundër figurës së Presidentit Ilir Meta. Ai përmendi disa herë gjatë fjalimit të tij gruan e presidentit madje arriti deri aty sa përmendi dhe vajzën e tij të vogël Era Meta.
“Ai shpalosi problemet që ka te partia në Bllok, nuk e di se çfarë vendi të botës, tek kjo që aspirojmë ne dhe jo ajo që aspiron Ilir, shqiptarëve u serviret gruaja e Presidentit si drejtuese partie dhe vajza e vogël, zonjë e parë e shtetit, që akoma nuk ka hequr bebelinën” tha ai.
Valteri i cilësoi si absurde deklaratat që Meta bëri në konferencën për mediat dy ditë më parë dhe shtoi se e gjithë kjo po bëhet për të mbrojtur interesat e LSI.
“Nuk çuditem me Presidentin, që kthen ligje, pasi nuk është fort mirë këto kohët e fundit. Konferenca e fundit e Presidentit ishte shfaqje e shëmtuar. Ishte shumë i mërzitur dhe armatosur me mllef, sulmoi cilindo që i dilte përpara me mendjen e trazuar nga ëndrrat, se është keq të bësh burg në këtë moshë, është problem i madh. Presidenti harroi edhe rolin që kishte, përfaqësuesi i unitetit kombëtar dhe jo i LSI-së.” shtoi Valteri.
Deklarata e Valterit, ku përmendej vajza e vogël e presidentit, Era Meta bëri që kreu i parlamentit Gramoz Ruçi të ndërhyjë duke i kërkuar deputetit që të kërkonte ndjesë dhe ti tërhiqte këto fjalë.
“Zoti Valteri është e padrejtë dhe kundër etikës ta ofendosh Presidentin dhe familjen e fëmijët e tij, prandaj kërkoj ti tërheqësh ato që the për atë”, iu drejtua kryeparlamentari, deputetit Halit Valteri. /Opinion.al
