Izraeli ka urdhëruar të gjithë në veri të Gazës që të evakuojnë rajonin, përfshirë ata në spitale.
Por një gjë e tillë është thuajse e pamundur, thotë zëdhënësi i Organizatës Botërore të Shëndetësisë, Tarik Jasareviç.
OBSH po i bën thirrje Izraelit që ta rishqyrtojë atë urdhër.
“Ka pacientë në Gaza që thjesht nuk mund të zhvendosen, shumë prej tyre janë në ventilatorë mekanikë, ka të porsalindur në inkubatorë, njerëz në kushte të paqëndrueshme dhe është shumë e vështirë t’i lëvizësh. Ne i bëjmë thirrje Izraelit që ta rishqyrtojë këtë urdhër”, tha ai.
Jasarevic shtoi se katër kamionë me materiale kirurgjikale dhe traumatike, si dhe ilaçe për sëmundje kronike u sollën në Gaza përmes pikës kufitare Rafah kohët e fundit, por sipas tij kjo nuk mjafton.
Ai tha se kishte më shumë kamionë me furnizime gati për të shkuar në anën egjiptiane të kufirit, por nuk kishin garanci sigurie që furnizimet mund të silleshin në mënyrë të sigurt.
