Tedros Adhanom Ghebreyesus, drejtori i përgjithshëm i Organizatës Botërore të Shëndetit, tha se ata nuk kanë asgjë për të fshehur.
“Si OBSH jemi të hapur, ne nuk fshehim asgjë … Ne duam që të gjitha vendet të marrin të njëjtin mesazh menjëherë sepse kjo i ndihmon vendet të përgatiten mirë dhe të përgatiten shpejt … Jo vetëm SHBA por të gjitha vendet marrin informacion menjëherë”, tha ai në konferencën e përditshme për mediat në Gjenevë.
Tedros shtoi se “kushdo që vdes është babai, gjyshja” e dikujt. “Janë jetë njerëzish dhe kjo është arsyeja pse ne preferojmë t’i shohim individët, fytyrat dhe njerëzit. Ata nuk janë numra ose mesatare, ata janë njerëz. ”
“Kjo është arsyeja pse ne nuk kemi sekrete dhe sa më shpejt që të kemi informacione i kalojmë ato. Ne duam të shpëtojmë jetë, edhe nëse është një jetë e vetme.”
Komentet e tij vijnë në një kohë kur OBSH është vendosur në qendër të akuzave të Shtëpisë së Bardhë pasi Presidenti Trump pretendon se ata kanë fshehur infomacione mbi gjendjen e pandemisë në Kinë. Për këtë arsye ai vendosi që të ndërpresë fondet për OBSH, rreth 15% e buxhetit vjetor të saj, veprim ky që u kritikua ashpër nga shumë liderë dhe personalitete në botë. /Opinion.al
