Organizata Botërore e Shëndetësisë nuk ka rekomandime të qarta për vendet dhe rajonet lidhur me lehtësimin e masave ndaj pandemisë, por iu kërkoi atyre që të mos nxitohen në heqjen e tyre.
“Një nga gjërat më të rëndësishme është që masat të mos hiqen shumë herët në mënyrë që të mos kemi një përkeqësim tjetër”, tha zëdhënësi i OBSH-së, Christian Lindmeier.
Sipas tij, kjo situatë, është e ngjashme me të qenit i sëmurë vetë, ku nëse ngritesh shumë shpejt nga shtrati, rrezikon të kesh komplikime.
“Nëse ngritesh shumë shpejt nga shtrati dhe vrapon shumë herët, rrezikon të biesh prapa dhe të kesh komplikime”, shtoi ai.
Disa vende të botës kanë paralajmëruar lehtësimin e masave të izolimit dhe të gjendjes së jashtëzakonshme.
Më 6 prill Austria tha se mund të nisë lehtësimin e masave të izolimit nga java e ardhshme, por kërkoi nga qytetarët që të vazhdojnë distancimin fizik, si masë për frenimin e përhapjes së koronavirusit./Opinion.al
