Shqipëria rrezikohet nga përhapja e fruthit sipas Organizatës Botërore të Shëndetit. Në një artikull të publikuar në faqen e saj zyrtare ditën e sotme, referuar raportit të fundit të Komisionit Rajonal të Verifikimit për Zhdukjen e Fruthit dhe Rubeolës, shkruhet se katër vende të Europës, përfshi edhe Shqipërinë, kanë humbur statusin e sigurisë ndaj përhapjes së fruthit.
“RVC përcaktoi që për herë të parë që nga fillimi i procesit të verifikimit në Rajon në vitin 2012, 4 vende (Shqipëria, Rep. Çeke, Greqia dhe Mbretëria e Bashkuar) humbën statusin e tyre të eliminimit të fruthit” shkruhet në faqen e OBSH.
Ky fakt është shqetësues për përfaqësuesit e organizatës më të madhe në botë për shëndetin pasi mund të këtë pasoja serioze në jetët e njerëzve.
“Rivendosja e transmetimit të fruthit është shqetësuese. Nëse mbulimi i imunizimit i lartë nuk arrihet dhe nuk mbahet në çdo komunitet, si fëmijët dhe të rriturit do të vuajnë dhe disa do të vdesin në mënyrë tragjike, “thotë Dr Günter Pfaff, Kryetar i RVC.
Megjithatë ekspertët e Komisionit të Verifikimit kanë vendosur të veprojnë në lidhje me këtë fenomen duke parashikuar një paketë masash për përmirësimin e situatës.
“RVC është një panel i pavarur i ekspertëve që mblidhet çdo vit për të vlerësuar statusin e eliminimit të fruthit në Rajon bazuar në raporte vjetore të gjera të paraqitura nga secili vend. Ai u takua në 12-14 qershor 2019 në Varshavë, Poloni për të vlerësuar raportet për vitin 2018 dhe e mbështeti përfundimin e tij në disa faktorë, përfshirë të dhënat e mbikëqyrjes së fruthit, mbulimin rutinë të imunizimit, përgjigjen ndaj shpërthimit, dhe arritjen e fushatave plotësuese të imunizimit dhe aktiviteteve të tjera” shkruhet në artikullin në faqen e OBSH. /Opinion.al
