“Europianët janë konsumatorët më të mëdhenj të alkoolit, por shumë pak prej tyre kanë informacionin për rrezikun e tij si faktor risku për zhvillimin e kancerit. Për këtë arsye të gjithë produktet e alkoolit duhet të kenë etiketën e paralajmërimit të rrezikut ashtu si produktet e duhanit”, raportoi gazetarja Erikleda Dorezi.
Pavarësisht se kanceri është shkaku kryesor i vdekjeve që i atribuohen alkoolit në Bashkimin Evropian ndërgjegjësimi i publikut për lidhjen midis alkoolit dhe kancerit mbetet jashtëzakonisht i ulët.
Një studim i OBSH i kryer në 14 vende të Rajonit Evropian, zbuloi një hendek të madh tek ndërgjegjësimi i popullatës. Vetëm 15% e të anketuarve e dinin se alkooli shkakton kancerin e gjirit dhe vetëm 39% ishin të vetëdijshëm për lidhjen e tij me kancerin kolorektal.
Këto lloje të kancerit përbëjnë përqindjen më të lartë të tumorit të gjirit tek gratë dhe ai kolorektal tek burrat të lidhur me alkoolin në Europë.
Europa pjesë e së cilës është edhe Shqipëria ka nivelet më të larta të konsumit të alkoolit në botë, dy herë nga mesatarja globale. Sipas OBSH alkooli shkakton rreth 800 000 vdekje çdo vit në Rajonin Evropian.
Shqetësim sipas OBSH është fakti se shumë vende të rajonit përfshirë Shqipërinë ende nuk kanë bërë përparim të rëndësishëm në zbatimin e politikave për reduktimin e dëmit të alkoolit.
Etiketat paralajmëruese për shëndetin e alkoolit zbatohen aktualisht në vetëm 3 nga 27 vende të BE-së dhe vetëm 13 nga 53 shtetet anëtare të Rajonit Evropian, duke i lënë konsumatorët të pavetëdijshëm për rreziqet me të cilat përballen.
