Kryeministri Edi Rama nuk i ka kursyer batutat as në çeljen e fushatës zgjedhore të PS për 14 majin.
Pasi mbajti një fjalim para kandidatëve për kryetar bashkie, kryeministri Edi Rama dhe socialistët e tjerë mbollën 61 pemë në sheshin “Skënderbej” në simbolikë të numrit të bashkive që ka vendi.
Pasi mbollën pemët socialistët bënë edhe foto me kryeministrin Edi Rama pranë sloganit, “Kurrë pas, përpara”. Në një moment, shfaqet kryeministri Rama teksa i “lutet” deputetit të PS, Pandeli Majko për të bërë një foto.
Ky i fundit refuzon, por Rama ka këmbëngulur duke thënë se janë “Live” dhe më pas njerëzit do thonë se Majko dhe Rama kanë probleme.
Edi Rama: Një fotografi këtu, 3 breza, veteranët, të mesmit dhe rinia, hajde pra.
Pandeli Majko: Jo, jo faleminderit!
Edi Rama: Ç’është ky?! Mos na e prish mo se jemi dhe live. Jemi live o Pandi, dhe do thonë pastaj ka probleme me kryetarin. Ja të kemi një fotografi të 3 brezave.
Pandeli Majko: Po ky është më i madh se unë o burrë. (Për Ramën, plasin të qeshurat)
Edi Rama: E kemi kështu, 3 brezat e socialistëve ju thonë vetëm përpara, kurrë mbrapa! Gjyshi, baba dhe mbesa.
PS do të mbjellë 61 pemë në Tiranë për 61 bashkitë, duke përjashtuar kështu tubimet apo format e zakonshme të fushatës zgjedhore. Vetëm 16 nga 61 kryetarët aktualë të bashkive do të jenë emra të rinj në listën e kandidimin për garën e 14 Majit nga kjo forcë politike, ndërkohë që 45 të tjerë do të kenë mundësi për t’u rikandiduar për një mandat të dytë ose të tretë.
