Prokuroria e Fierit ka dërguar në gjyq me akuzën shpërdorim detyre dhe nxjerrje te informacioneve e te dhenave sekrete, Florian Bushin, ish-agjent i SHISH i arrestuar në janar 2016 me akuzën se i ka dërguar në celular dokumente përgjimesh shtetasit Ilir Memushaj.
Bushi ishte arrestuar me akuzën e korrupsionit nga prokuroria e krimeve të rënda, por kjo e fundit nuk arriti ta provonte këtë vepër duke gjetur prova vetëm për shpërdorim detyre nga agjenti i sektorit të antitrafiqeve në SHISH.
Për këtë arsye kompetenca e hetimit i takonte prokurorisë së Fierit ku dosja u transferua me vendim të krimeve të rënda. Prokuroria e Fierit ka kryer disa veprime hetimore dhe më pas e ka nisur dosjen ndaj Bushit në Gjykatë. Gjatë deklarimeve pas arrestimit, Bushi ka pranuar se e njeh Ilir Memushajn që para se të punësohej në SHISH, por nuk i ka dërguar dokumentet që janë gjetur në telefonin e të arrestuarit për vrasje.
Bushi ka thënë se nuk e di sesi dokumentet në fjalë janë gjetur në telefonin e të arrestuarit, por ka shtuar se mbi raportet e përgjimit e vëzhgimit kanë akses edhe punonjës të tjerë.
Agjenti i SHISH do te gjykohet në Fier bashkë me shtetasit Ilir Memushaj dhe Ermal Binjaku te akuzuar për vrasjen e ndodhur ne Mbrostar të Fierit në janar 2016. / Panorama
