Nxjerrja e të dhënave personale nga portali e-Albania dhe akuzat se po përdoren nga PS për zgjedhjet e 25 prillit ka shkaktuar debate në publik teksa na ndajnë vetëm disa ditë nga zgjedhjet.
Mes emrave të njohur, në listë ishte edhe ai i ish-kryeministrit Sali Berisha, patronazhisti i të cilit ishte gazetari i njohur sportiv, Ervin Baku.
I ftuar në emisionin “7pa5” në “Vizion Plus”, Baku theksoi se u befasua kur u informua nga mediat, duke e cilësuar këtë fakt si një gjë absurde.
Ndër të tjera Baku e cilësoi nxjerrjen e të dhënave personale si shkelje flagrante e të drejtave të njeriut.
“E kam marrë me sportivitet këtë lajm që ka dalë këto ditë. Jemi në muajin prill dhe dihet me çfarë feste fillon ky muaj. Me Berishën kam marrëdhënie shumë të mira që datojnë që nga koha ime në Strasburg, por nuk ndikojnë në bindjet e mia sportive, kulturore, artistike, apo edhe politike. Unë nuk jam në dijeni, më duket shumë butaforike. Kjo është shkelje flagrante e të drejtave të njeriut. Jam kundër këtyre praktikave. Realisht jam kundër këtyre praktikave. Nuk duhet të ndodhin gjëra të tilla. Unë e mora me shumë sportivitet.”
