Të dielën, në Kavajë zhvillohen zgjedhjet lokale, në të njëjtën ditë kur opozita ka thirrur mbështetësit nga e gjithë Shqipëria të protestojnë.
Por nxënësit e gjimnazit Aleksandër Moisiu të Kavajës i kanë paraprirë tubimit të PD-së, me një protesta ditën e sotme. Dera e shkollës është mbyllur me zinxhirë dhe të rinjtë kanë dalë me pankarta. Lajmin e ka bërë të ditur ish-kryeministri Berisha në një status në rrjetet sociale duke publikuar disa fotografi me anë të të cilave njofton se mosbindja civile ka nisur. Në të njëjtën shkollë, disa ditë më parë u filmua një mësuese që i kërkonte nxënësve të dilnin në mitingun e organizuar nga Partia Socialiste, ku merrte pjesë edhe kryeministri Edi Rama.
