Janë zbardhur detaje të reja lidhur me arrestimin në Fier të Nuredin Dumanit, i cili ishte i shpallur në kërkim nga autoritetet për disa krime të rënda.
Mësohet se Dumani jetonte në një banese me qira ne lagjen ‘Apollonia’ në Fier, bashkë me një vajzë nga Kosova.
Në momentin e arrestimit, Dumani ishte i armatosur dhe i plagosur, pasi dyshohet se ishte i përfshirë në atentatin e pasdites së djeshme në fshatin Papër në Elbasan. Në këtë atentat u qëllua drejt një automjeti “BMW”, ku dyshohet se Dumani mbeti i plagosur
Në banesën në katin e fundit të një pallati në Fier, ku jetonte Dumani, u gjet në cilësinë e provës materiale edhe një kallashnikov.
Brenda mjetit u gjet gjithashtu 1.5 litra benzinë dhe një karikator i mbushur. Paraprakisht për këtë rast dyshohet se do të zhvillohej një krim, ndërsa është parandaluar pak para se të ndodhte.
Vlen të përmendet se Dumani është një emër i njohur i drejtësisë. Ai dyshohet për vrasjen e vëllait të Talo Çelës, Bujar Çela, si dhe katër të rinjve në Durrës. Këto ngjarje kanë ndodhur në vitin 2020. Aktualisht ai ndodhet në spitalin e Traumës jashtë rrezikut për jetën.
