Të tjera detaje janë bërë të ditura nga marrëveshja e firmosur mes Shqipërisë dhe Italisë, ku kjo e fundit do të ngrejë kampe për emigrantët e paligjshëm në vendin tonë.
Më poshtë do të gjeni një përmbledhje të marrëveshjes së nënshkruar mes dy shteteve dhe përgjegjësisë që shteti italian do të ketë ndaj emigrantëve të sjellë në Shqipëri.
Numri total i migrantëve dhe hyrja në territorin e Republikës së Shqipërisë.
Marrëveshja është lidhur në kuadrin e traktateve dhe protokolleve të mëparshme të lidhura me Republikën e Italisë në këto fusha si dhe me qëllimin, dhe në përputhje me legjislacionit ndërkombëtar që rregullon të drejtat e migrantëve azilkërkues.
Nëpërmjet kësaj marrëveshje i jepet palës italiane vetëm e drejta e përdorimit të zonave të përcaktuara pa kundër-shpërblim. Zonat që do të jepen në përdorim do të menaxhohen tërësisht nga pala italiane sipas juridiksionit të shtetet italian, i cili do të jetë juridiksioni përgjegjës për zgjidhjen e cdo mosmarrëveshje të lindur brenda zonave.
Në marrëveshje është dakordësuar që numri total i migrantë prezent në zonat e caktuara nuk do të kalojë shifrën 3 000 (tre mijë). Migrantët do akomodohen në strukturat pritëse vetëm me qëllimin e kryerjes së procedurave kufitare të riatdhesimit dhe pas përfundimit të tyre do të nxirren jashtë territorit të Republikës së Shqipërisë. Afati maksimal i qëndrimit të tyre do të jetë në përputhje me afatin e përcaktuar në legjislacionin italiane për këto procedura.
Transporti në territorin shqiptar dhe shoqërimi i emigrantëve pas përfundimit të procedurave jashtë këtij territori do të kryhet nga vetë pala italiane me mjetet e saj. Pala shqiptare ka rezervuar të drejtën në marrëveshje për të marrë të dhënat e migrantëve që do të hyjnë në territorin shqiptar.
Shërbimet shëndetësore.
Sipas parashikimeve të marrëveshjes, pala italiane do të garantojë, me shpenzimet e saj kushtet higjeno-sanitare dhe shërbimet shëndetësore brenda në zonat e caktuara në përputhje me normat e vendosura nga konventat ndërkombëtare të fushës. Rastet të cilat do të kërkojnë një trajtim shëndetësor më të specializuar, do të trajtohen në strukturat spitalore shqiptare kundrejt pagesës së shpenzimeve nga pala italiane.
Elementët e sigurisë.
Siguria brenda zonave të përcaktuara në marrëveshje do të garantohet nga vetë pala italiane, e cila ka detyrimin për të ruajtur rendin dhe sigurinë publike në perimetrin e brendshëm. Pala shqiptare angazhohet të ruajë rendin dhe sigurinë në perimetrin e jashtëm si dhe gjatë transportit të migrantëve nga njëra zonë në tjetrën. Pala shqiptare ka rezervuar të drejtën për të aksesuar brenda në zona në rast të rreziku potencial i cili do të kërkojë ndërhyrje të menjëhershme. Migrantët nuk do të jenë të lejuar të dalin jashtë zonave të caktuara gjatë gjithë kohëzgjatjes së qëndrimit të tyre në territorin shqiptar. Në rastet kur kjo nuk do të respektohet, pas lokalizimit nga ana e autoriteteve shqiptare, migrantët do të rikthehen përsëri brenda zonave, duke ju dorëzuar palës italiane.
Efektet financiare të marrëveshjes.
Të gjitha shpenzimet për ngritjen e qendrave dhe infrastrukturës së tyre në zonat e caktuara, shpenzimet shëndetësore, shpenzimet në lidhje me sigurinë do të mbulohen 100 % nga pala italiane. Gjithashtu pala italiane do të mbulojë çdo shpenzim të paparashikuar i cili buron nga kjo marrëveshjes bashkë me çdo shpenzim gjyqësor dhe dëmshpërblim dëmesh potenciale, përfshirë dhe kostot e përfaqësimit gjyqësor, të cilat burojnë nga kjo marrëveshje dhe mund ti faturohen Republikës së Shqipërisë në rrugë gjyqësorë./Opinion.al
