Futja e PDIU-së në koalicionin qeverisës në 2015 i ka kushtuar jo pak LSI. Sot partia e çamëve ka gjysmën e numëruesve në 90 qendrat ku do numërohen votat e 25 Qershorit 2017.
Por, me sa duket Meta dhe Idrizi janë dakordëruar për të bashkëpunuar. Aty ku do jetë numëruesi i LSI do ruhet edhe vota e PDIU-së dhe anasjelltas. Kështu të paktën deklaroi një ditë më parë Ilir Meta nga selia e partisë së tij.
Por çfarë ndodhi sot në KQZ?
Përkatësia politike e numëruesit të tretë u hodh në short dhe u vendos që: Lëvizja Socialiste për Integrim të ketë numëruesin e tretë në tavolinat me numër çift në të 90 Zonat e Administrimi Zgjedhor(ZAZ), në shkallë vendi, ndërsa Partia Drejtësi, Integrim dhe Unitet te marrë numëruesin e tretë në tavolinat me numër tek.
Grupet e numërimit të votave përbëhen nga katër anëtarë; Një anëtar emërohet pas propozimit të partisë politike, së cilës i përket kryetari i KZAZ-së, një anëtar pas propozimit të partisë që i përket nënkryetari, ndërsa anëtari i tretë propozohet nga partitë e shumicës qeverisëse dhe anëtari i katërt emërohet pas propozimit të partive të opozitës që kanë të drejtë të propozojnë anëtarë të GNV-ve për ZAZ-të respektive, sipas procedurës së parashikuar në nenin 96 të Kodit Zgjedhor.
Pra praktiksht PD, PS, PR kanë nga një numërues në çdo tavolinë. Ndërsa LSI dhe PDIU janë dy gjysmat.
Reagimi i LSI
Lëvizja Socialiste për Integrim është shprehur kundër shortit në KQZ që ndau mes LSI dhe PDIU, numëruesin e tretë në grupet e numërimit të votave.
Nënkryetari i LSI, Luan Rama tha se sipas rezultateve të vitit 2013, numëruesi i tretë i takonte LSI dhe KQZ nuk kishte nevojë të hidhte short me forcat e tjera politike.
/Opinion.al
