Fantazma e Jeffrey Epstein vërtitet çdo ditë mbi politikën amerikane, teksa emri i Donald Trump vazhdon të përmendet dhe duket se disa nga mbështetësit e tij po e braktisin.
Mark Epstein, vëllai i ish-financierit, tha në një intervistë për medin italiane Corriere della Sera se nuk beson që ai të ketë vrarë veten.
Ai tha se kur mjekët dolën nga autopsia nuk mund ta përcaktonin rastin si vetëvrasje, pasi dukej më shumë sikur Jeffrey Epstein ishte vrarë dhe në certifikatën e tij të vdekjes ata shkruan se duheshin bërë ekzaminime të mëtejshme. Por vetëm disa ditë më vonë mjekët thanë se Epstein ishte vetëvrarë, pa shpjeguar çfarë ekzaminimi ishte bërë.
Mark ngriti dyshime edhe ndaj ish prokurorit të përgjithshëm Bill Barr, i cili nuk mori parasysh faktin se në katin ku ndodhej qelia e Epstein, kishte edhe 12 të burgosur të tjerë, që mund ta kishin vrarë ish-financierin.
Më tej ai shtoi se Jeffrey Epstein i kishte ndërprerë marrëdhëniet me Trump, pasi e konsideronte mashtrues. Dhe jo vetëm kaq, Epstein i kishte thënë të vëllait se kishte informacione të dëmshme për Trump.
Intervista e Mark Epstein vjen në një kohë kur departamenti amerikan i drejtësisë ka mbajtur takime me Ghislane Maxëell, ish-partneren e Epstein që e ndihmoi atë në trafikimin dhe abuzimin e vajzave të mitura.
Ndërkohë sipas medias britanike Daily Mail, në një nga dëshmitë e saj në gjyq, Maxwell ka përmendur takimin e Donald Trump me një vajzë 14-vjecare në Mar a Lago në Florida. Bëhet fjalë për vajzën me pseudonimin “Jane”, e cila ka qenë ndër viktimat e Epstein. Ajo e ka përmendur emrin e Donald Trump, megjithatë nuk e ka akuzuar presidentin për përfshirje në krime.
