Gjatë fjalës së tij në Parlament, kryeministri Edi Rama ka qenë i prerë duke thënë se nuk do të ketë përsëritje të marrëveshjes të majit të vitit 2017. Rama tha se Partia Demokratike pati gjysmën e qeverisë dhe jo vetëm që humbi zgjedhjet, por nuk bëri asgjë nga ato që u zotua.
“Ne në 2017-ën u dhamë atyre mundësinë që të rifuten në lojë, por nuk do ua u japim më këtë mundësi, sepse morën atë që deshën po nuk i bënë ato për të cilat u zotuan. U dhamë gjysmën e qeverisë dhe prapë i humbën zgjedhjet. Ata do t’i mundim përsëri, edhe juve bashkë me ata (i drejtohet deputetëve të rinj të opozitës në sallë), do t’ju mundim prapë, më thellë dhe ato dy siglat do t’i çojmë për skrap”, u shpreh Rama.
Rama u shpreh se në zgjidhjen e krizës nuk do të ndikojnë as ndërkombëtarët dhe as negociatorët, por do të zbatohet vetëm Kushtetuta e Shqipërisë.
“Nuk do hapim rrugë kurrë. Kjo nuk ka për të ndodhur. Se na ka mbetur fallxhorja pa rrogë, nuk ka. Në atë territor atje, të shkojnë të paguajnë filxhan për filxhan. Ta harrojnë se do vijë dikush nga qielli dhe të negociojë. Partia Demokratike e ka bërë edhe më herët këtë gjë, por nuk do të përsëritet më”, ka thënë Edi Rama./Opinion.al
Lexo edhe: Rama i drejtohet deputetëve të rinj: Jeni njësoj si ata jashtë!
Lexo edhe: Sistemi zgjedhor, Rama i përgjigjet Rudina Hajdarit
