Debati në distancë mes kryeministrit Rama dhe kreut të PD, Lulzim Basha për marrjen e masave parandaluese të koronavirusit duket se është ‘ngrirë’ për momentin, por megjithatë akuzat vazhdojnë.
LEXO EDHE – Koronavirusi rrezikon Shqipërinë,Rama dhe Basha vijojnë ‘luftën e maskave’
Rolin protagonist tashmë e kanë marrë dy Sekretarët e Përgjithshëm të Partive, Taulant Balla dhe Gazment Bardhi.
Nëpërmjet të një reagimi, Balla akuzon opozitën se po përhap panik dhe po nxit ankth me informacione të pavërteta.
“48 orët e fundit janë një shpërthim histerie me në krye të së cilës shfaqet si gjithmonë Sali Berisha, cili ka shtuar numrin e postimeve të rreme. Me paturpësinë malinje që e karakterizon ai poston video nga Irani, se gjoja ato pamje janë në Tiranë. Pas Saliut vjen natyrshëm dështaku epokal Lulzim Basha, me lloj-lloj përpjekje, që synojnë të demoralizojnë ekipet e mjekëve dhe infermiereve si dhe të rrisë sa më shumë panikun” shkruan ndër të tjera ai në Facebook.
Reagimi i Ballës u ndoq nga ‘homologu’ i tij në PD ndonëse ky i fundit nuk iu përgjigj atij drejtpërdrejtë.
Bardhi i bëri thirrje prokurorisë dhe kryeprokurorit, Olsian Cela që të nisë hetimet për shpërndarjen e maskave të cilat PD i denoncoi sot si të skaduara.
“Uroj që Prokurori i Përgjithshëm të veprojë ndryshe nga Kryeministri, i cili sot i mori mjekët dhe qytetarët për budallenj, duke ju thënë që produktet farmaceutike mund të përdoren edhe pas datës së tyre të skandencës! Edi Rama dhe Ogerta Manastirliu e dinë mirë që sipas ligjit maskat e skaduara konsiderohen mbetje spitalore, të kategorisë “mbetje farmaceutike” dhe që po sipas ligjit, nuk mund të përdoren, por duhet të asgjesohen! Për pasojë, shpërndarja e 1.2 milion maskave të skaduara që në vitin 2011 është krim!”, shkruan Bardhi. /Opinion.al
