TIRANË- 48 orë pas plagosjes së gjyqtarit Artan Gjermeni, policia ka dërguar provat në prokurori duke kërkuar të hetohet për ‘plagosje të lehtë’. Por prokuroria e Tiranës e ka referuar çështjen në prokurorinë e Durrësit duke shpallur moskompetencë për hetimin e gjyqtarit Gjermeni. Sipas prokurorëve, çështja nuk mund të hetohet në Tiranë për shkak se ka konflikt interesi, pasi Artan Gjermeni është gjyqtar i Gjykatës së Shkallës së parë të rrethit gjyqësor Tiranë.
Por për çfarë do të hetohet Gjermeni?
Vetë gjyqtari ka deklaruar në polici se plagosja ka qenë aksidentale duke kërkuar që të mos vazhdohet me tej me hetime, por policia në vendngjarje ka konstatuar se plagosja nuk ka qenë aksidentale. Ka dyshime, thonë burimet se ai mund të jetë përfshirë në një konflikt të momentit ku edhe ka mbetur i plagosur me thikë. Pikërisht mbi provat e gjetura në vendngjarje, policia kërkon hetim për plagosjen e gjyqtarit Artan Gjermeni. Gjithashtu në makinën e tij janë gjetur 20 mijë euro. Edhe për këtë shumë cash, policia kërkon të hetohet nga prokuroria për origjinën e tyre, pasi ka dyshime se mund të jenë përfituar përmes rryshfetit.
Artan Gjermeni u paraqit mbrëmjen e së dielës në Qendrën Spitalore Universitare ‘Nënë Tereza’, në Tiranë me disa plagë në dorë, këmbë dhe brinjë. Ai tha se ka qenë në garazhin e makinës dhe aty është prerë me një llamarinë. Por nga këqyrja e vendit të ngjarjes dhe dëshmitë, policia konstatoi se aty nuk kishte llamarina dhe as gjurmë gjaku në garazh.
Gjurmët e gjakut janë gjetur vetëm në makinën tij tip ‘Smart’ me të cilën Gjermeni ka udhëtuar nga pallati i tij në rrugën e Elbasanit drejt QSUT-së. E gjithë çështja është e veshur me mister. Më shumë dyshimet shtohet për faktin se gjyqtari mbante në makinë 20 mijë euro, për të cilat nuk ka pranuar të japë asnjë sqarim në polici. /opinion.al/
