Gjykata e Shkodrës ka lënë në masën e sigurisë “arrest me burg” Erdgys Arrazin, babain e tre fëmijëve të mitur të mbytur së bashku me nënën e tyre në lumin Bunë.
Ditën e sotme ai është dërguar nga ambientet e paraburgimit në gjykatë për njohjen e masës së sigurisë ndaj tij.
Arrazi nuk ka folur shumë në sallën e gjyqit, ndërsa është shfaqur në një gjendje të rënduar psikologjike.
Erdgys Arrazi: Nuk mund të flas! Jam dakord me deklarimet e avokatit dhe mund të flas në një moment tjetër.
Ndërkohë avokati mbrojtës, Blerim Bazhdari kërkoi lirimin e Erdgys Arrazit pasi sipas tij nuk ka asnjë provë që vërteton dhunën në familje që pretendon Policia, Prokuroria apo edhe motra e viktimës.
Pala mbrojtëse paraqiti një prej recetave mjekësore të Alma Arrazit që sipas avokatit vërteton se 39 vjeçarja vuante nga probleme të shëndetit mendor.
Pavarësisht këtyre pretendimeve të avokatit, togat e zeza e lanë në fuqi masën “arrest në burg” për 31 vjeçarin. Ky i fundit u arrestua të dielën pas deklarimeve në polici të kunatës së tij se ushtronte dhunë fizike dhe psikologjike ndaj gruas dhe 3 fëmijëve.
Çifti Arrazi prej kohësh kishin patur debate, ndërsa kohet e fundit Alma Arrazi kishte marrë vesh se burri e tradhtonte. Kjo e ka rënduar edhe më shumë gjendjen e saj psikologjike.
