1 vit hetime nuk i mjaftuan Prokurorisë së Elbasanit të zbardhte të plotë vrasjen e Pjerin Xhuvanit dhe plagosjen e 4 personave të tjerë, pas përplasjes me armë zjarri 4 ditë para zgjedhjeve parlamentare.
Me vendim gjykate hetimet për këtë dosje u zgjatën me 3 muaj në pritje të administrimit të gjithë akt ekspertimeve që janë kërkuar.
Në pranga për ngjarjen është Arbër Paplekaj, ish efektivi i repartit RENEA, për të cilin prokuroria ka të dokumentuar se në 21 prill të vitit të shkuar qëlloi në drejtim të Pjerin Xhuvanit, duke e lënë të vdekur.
Ndërkohë në kërkim është shtetasi Kelment Xhaferri, i cili dyshohet si personi i dytë që ka qëlluar me armë zjarri në këtë ngjarje. Arrestimi i tij ende nuk është bërë i mundur.
Burme për Tv Klan thanë se nga kqyrja e vendit të ngjarjes janë gjetur 21 gëzhoja, të 3 kalibrave te ndryshëm.
Sipas Prokurorisë, Paplekaj bashkë me disa persona të tjerë kishin ndaluar shtetasin Mehmet Greca në lagjen 5 maji me dyshimin se po shpërndante lekë për të siguruar vota në 25 prill. Gjatë kësaj kohe janë grumbulluar shumë persona dhe disa minuta pasi në vendin e ngjarjes kanë mbërritur drejtuesit e Policisë së Elbasanit ka pasur shkëmbim zjarri./Tv Klan
