Deri sot ishte thjesht një paralajmërim, por tashmë është fakt. Shoqata Bashkimi i Arbitrave të Futbollit Shqiptar ka deklaruar se do të bojkojnë kampionatin duke nisur nga kjo fundjavë. Shkak i këtij vendimi u bë dhunimi i arbitrit Eldorjan Hamiti në takimin Kamza-Laçi.
“Shoqata Bashkimi i Arbitrave të Futbollit Shqiptar thotë se e tronditur pas ngjarjes së dhunës ekstreme ushtruar ndaj gjyqtarit Eldorjan Hamiti në Kamëz, ka marrë sot vendimin e saj për të bojkotuar ndeshjet e futbollit në nivel kombëtar.Duke parë që nga java e parë e kampionatit dhe deri në të fundit ne ndjehemi të pasigurtë, sot ne vendosëm të themi: Mjaf! Mjaft më me kërcënime, fyrje e sharje. Mjaft (dhe kjo është shumë më serioze dhe e rrezikshme) me dhunë e ç’është më e rëndësishmja, mjaft më me pasiguri për jetën”.
Njëzëri arbitrat mendojnë se eksperimenti i deritanishëm për largimin e Policisë së Shtetit nga stadiumet e futbollit ka dështuar. Sipas tyre, zëvëndësimi i efektivëve të rendit me polici private është një dështim tjetër tashmë i konsumuar. Në këtë vendim ekstrem të Shoqatës Bashkimi i Arbitrave të Futbollit Shqiptar, një dorë të fortë duket se ka dhënë edhe lirimi i të arrestuarve për episodet e dhunës.
“Nuk kemi se ç’të presim më edhe nga eksperimenti tjetër i zbatimit të ligjit, i cili ka dështuar plotësisht, përderisa autorët e dhunës janë liruar sot, edhe se pamjet filmike janë shumë të qarta dhe media ka katër ditë qe e ka në qëndër të vëmëndjes këtë ngjarje. Mjaft u eksperimentua. Ne kemi vendosur të mos luajmë me jetën tonë. Kështu nuk do të kthehemi për të gjykuar, deri sa të ndjehemi të sigurtë dhe Policia e Shtetit të kthehet në stadiume dhe autorët e dhunës të ndëshkohen”.
Shoqata Bashkimi i Arbitrave të Futbollit Shqiptar i kërkon klubeve anëtare në FSHF që ta mirëkuptojnë dhe ta mbështesin në vendim që ka marrë, sepse në gjykimin e saj është e vetmja rrugë që gara të jetë sa më e vërtetë dhe korrekte. /B.K Opinion.al
