Sociale

“Nuk ka publicitet të keq”, edhe Daily Mail shkruan për “Taken by Albania”


               Publikuar në : 22:50 - 15/03/19 |
xhu lia

Slogani i fundit i ministrisë së Turizmit “Taken by Albania“ ( i rrëmbyer nga Shqipëria) i huazuar nga filmi i njohur i aktorit Liam Neeson, ku shqiptarët paraqiten si rrëmbyes dhe trafikantë droge, për të promovuar turizmin në Shqipëri vijon të shkaktojë reagime në mediat botërore.
Sipas shkrimit të publikuar nga DailyMail është një veprim i guximshëm të promovosh turizmin dhe Shqipërinë si një destinacion pushimesh me një slogan që i referohet një filmi, ku shqiptarët paraqiten si rrëmbyes dhe trafikant droge dhe seksi.


Por duket se kjo është ajo çfarë Shqipëria ka bërë me promon e re për turizmin “Rrëmbehu nga Shqipëria”. Në vazhdim të shkrimit të Daily Mail, thuhet se në këtë rast përshtatja e fjalës ‘rrëmbim’ ka të bëjë me idenë ‘tërheqjes’, ndonëse është e pamundur që kjo fjalë të mos lidhet me filmin e vitit 2008 të Liam Neeson, i cili ka të bëjë me idenë e trafikimit njerëzor dhe të drogës nga shqiptarët.
Kjo lidhje në videon e publikuar nga Ministria e Turizimit, i referohet reputacionit për aktivitete kriminale që kanë shqiptarët dhe fton aktorin të vijë t’a vizitojë Shqipërinë.

 

 

DailyMail vijon duke cituar disa nga fjalët e thëna në video për këtë rast: “Në kulturën popullore Shqipëria është përshkruar si parajsë për drogën, kriminelët dhe gangsterët. Ne e kuptojmë që ky perceptim mund të bëjë për filma të mirë si “Taken” është tërësisht i pavërtetë. Në të vërtetë Shqipëria është një vend i bukur dhe gjithashtu një vend i sigurt për të vizituar dhe për të jetuar.”
Në video ftohet aktori i njohur Neeson që të vijë në Shqipëri dhe të ‘rrëmbehet’ nga bukuria e natyrës, mikpritjes dhe traditave, shkruan DailyMail. Në vijim e përshkrimit të videos thuhet se janë duke u inkurajuar vizitorët që të firmosin një peticion për të bindur aktorin që ta vizitojë Shqipërinë, një veprim që edhe mund të keqkuptohet prej tij.


Vetëm gjatë muajit të kaluar Neeson shkaktoi polemika pasi i tregoi një gazetari sesi është përgatitur për rolin e tij të fundit mjaft të dhunshëm në filmin ‘Cold Pursuit’. Në intervistën që aktori Liam Neeson ka dhënë për “The Guardian” ka shpjeguar sesi përdhunimi i një shoku të tij 40 vite më parë e kishte çuar në një moment çmendurie për të kërkuar hakmarrje tek çdo person me ngjyrë që do t’i dilte para atë mbrëmje, duke lënë përshtypje si racist.

 


Kjo sipas tij e ndihmoi që të luante rolin e një personi që i kishin vrarë djalin. Ministria e Turizmit në Shqipëri mund të jetë duke shpresuar që lidhja e filmit dhe aktorit në fushatën e saj mund t’i bëjë njerëzit të flasin për Shqipërinë duke adoptuar shprehjen e njohur “nuk ka publicitet të keq”, përfundon shkrimin e saj Daily Mail./Xh.K/Opinion.al/

Pas